أبكي

أبكي وأحكي للعشاق شوقك
أبكي وأحكي لليالي دموعك
غني يا خويا
قول للدنيا وللأيام
وللساعات والأحلام
قول من جواك حرقتك
لهفتك
بتحبها
بتعشقها
وتغني ليها المواويل
بلا حب بلا طين
ما فيش حب يبقى مع الأتنين
فاكر أحمد وخالد واسماعين
ولا ندى وفاطنه وأم ابراهيم
دول كانوا ما فيه زيهم اتنين
قلنا اللهم صلي على النبي
قلنا يارب يبقوا مجانين
ولفت بيهم الدنيا
وأتفرقوا الأتنين
أيه لسه عايز تبكي
ابكي بس بكره تندم
وتجيني تقول
يا عمي يا شتاء ألحقني
دأنا جرحي فاق العاقلين
بكل لحظه بتغنيها
زي سيرة أبو زيد
أما تتقال بالموالد
والحكاوي الشعبية
ع القهاوي
تبقى غناوي
ع السكك
تتحكي سيرة يا عاشق
ايه لسه ما تعبتش
عايز تبكي
أبكي كتير
وأقتل جواك بكره
والنهارده
وحلمك الكبير
عيش عيشة الدراويش
وأطلع على ما فيش
وحياتك ما تجيش
وأما يتمسح الحزن من جواك
والشمس تشرق بسماك
والقمر ينور سكتك
ابقى تعالا وح ستناك
1/2/2008