أنا مش مصدق يا مصر
إن مصري بيقتل مصري
وده مصري بيضرب مصري
أخويا إبنك يا مصر
رافع سلاحه
بيضرب في ولاده
بيقتل في أخوانه
بيتاخد على خوانه
لمصلحة مين ولامين
فين ولادك العاقلين
هما معتصمين
ولا متفرقين
ميدان التحرير بيصرخ
صرخة غضب
كوبري قصر النيل إتجرح
مات الفرح إللي طرح
زمان جناين ياسمين
دلوقتي مش عارفين أحنا مين
جوايا القلب إترعب
وإحنا متفرقين
جواكي يا محروسه متغربين
يا مصر قولي لولادك حرام
كفايه كفايه ملام
وقتل وإنقسام
فكريهم بجمال والسادات
وإكتوبرالعظام
فكريهم بتراثك وترابك
ورقصة الحمام
فكريهم كمان بالقرآن
إدخلوا مصر.. آمنين
فين المصري اللى مالوش إتنين
آه يا جدع فين البني آدمين
فينك يا حليم
وفين حلاوة الشعب وأغانيك
فين صوتك
الى بياخدنا تملّي الوطنين
يا عم حمدي راحت أيامك
وأتقتلت أحلامك
يا أم ضفايرحنا
اتسرق فستانك
طرحتك يامصر إتملت دم
على كوبري 6أكتوبر متقاتلين
صدقيني عايز أصرخ وأتكلم
عايز أقول أمتى ح نتعلم
بس أصلي الألم جوايا أتعدم
أصلي الألم بكى النخيل
خنق النيل
والشط والأصيل
وآه يا هووه .. يا مصريين
كفايه أرجعوا إحنا مستنين
2\1\2011
